நீங்கள் தேடியது "காய்ச்சல் பாதிப்பு"

சென்னை:

தமிழகத்தில் டெங்கு காய்ச்சல் பாதிப்பு தற்போது அதிகரித்து வருகிறது. சென்னை, காஞ்சீபுரம், திருவள்ளூர், கோவை, சேலம், மதுரை, நெல்லை, வேலூர் உள்ளிட்ட பல மாவட்டங்களில் டெங்கு காய்ச்சலால் குழந்தைகள், பெரியவர்கள் பாதிக்கப்பட்டு அரசு மருத்துவமனைகளில் சிகிச்சை பெற்று வருகிறார்கள்.

ஒரு சில மாவட்டங்களில் பன்றி காய்ச்சலும் பரவி வருகிறது. ஒரே நேரத்தில் இரண்டு விதமான வைரஸ் கிருமிகளும் பரவிவருவதால் அதனை தடுக்க தமிழக சுகாதாரத்துறை அனைத்து முன் எச்சரிக்கை நடவடிக்கைகளையும் மேற்கொண்டுள்ளது.


சென்னையில் கொசுக்கள் உற்பத்தியாகும் இடங்களை கண்டறிந்து அவற்றை அழிக்கும் பணியில் மாநகராட்சி அதிகாரிகள் ஈடுபட்டுள்ளனர். டயர், பழைய கழிவுகள், தண்ணீர் தேங்கி நிற்கும் இடங்கள் ஆகியவற்றை ஆய்வு செய்து சுத்தம் செய்யும் பணி தீவிரப்படுத்தப்பட்டுள்ளது.

சுகாதாரத்துறையின் தடுப்பு நடவடிக்கை ஒருபுறம் இருந்தாலும் கூட காய்ச்சலால் பாதிப்பு அதிகரித்து வருகிறது. சென்னை மற்றும் அதனை சுற்றியுள்ள புறநகர் பகுதிகளில் காய்ச்சலால் பாதிக்கப்பட்டவர்களின் எண்ணிக்கை அதிகமாக இருப்பதாக சுகாதாரத்துறைக்கு தகவல் வந்துள்ளது.

சென்னையில் 4 அரசு ஆஸ்பத்திரிகளில் மட்டுமே 250 பேர் காய்ச்சலால் பாதிக்கப்பட்டு சிகிச்சை பெற்று வருகின்றனர். ராஜீவ்காந்தி அரசு ஆஸ்பத்திரியில் காய்ச்சலால் பாதிக்கப்பட்டு 45 பேர் அனுமதிக்கப்பட்டு இருப்பதாகவும் 3 பேருக்கு டெங்கு இருப்பதும் உறுதி செய்யப்பட்டு இருப்பதாக மருத்துவமனை டீன் டாக்டர் ஜெயந்தி தெரிவித்துள்ளார்.

அங்கு காய்ச்சலால் பாதிக்கப்பட்டு வருவோருக்கு 50 படுக்கை வசதியுடன் 2 வார்டு தயாராக இருப்பதாகவும், டெங்குவினால் பாதிக்கப்படுவோருக்கு உரிய சிகிச்சை அளிக்க மருத்துவர்கள், நர்சுகள் தயாராக இருப்பதாகவும் அவர் தெரிவித்தார்.

கீழ்ப்பாக்கம் அரசு ஆஸ்பத்திரியில் காய்ச்சலால் பாதிக்கப்பட்டு இன்று வரை 53 பேர் அனுமதிக்கப்பட்டு உள்ளனர். இதில் 27 பேர் பெரியவர்கள், 26 பேர் குழந்தைகள் ஆவர். இதுதவிர 5 பேருக்கு டெங்கு ‘பாசிட்டிவ்’ இருப்பதால் அவர்களுக்கு தனியாக சிகிச்சை அளிக்கப்பட்டு வருவதாக மருத்துவமனை டீன் டாக்டர் வசந்தாமணி தெரிவித்துள்ளார்.

ஸ்டான்லி அரசு ஆஸ்பத்திரியில் காய்ச்சல் வார்டில் 100 பேர் அனுமதிக்கப்பட்டுள்ளனர். 2 பேருக்கு டெங்கு காய்ச்சல் இருப்பது உறுதி செய்யப்பட்டு அதற்கான சிகிச்சை அளிக்கப்பட்டு வருகிறது. இதுகுறித்து மருத்துவமனை டீன் பொன்னம்பல நமச்சிவாயம் கூறியதாவது:-

கடந்த வருடத்தை ஒப்பிடும் போது தற்போது காய்ச்சல் பாதிப்பு குறைவாக உள்ளது. காய்ச்சல் வார்டில் நோயாளிகள் தீவிரமாக கண்காணிக்கப்பட்டு சிகிச்சை அளிக்கப்பட்டு வருகிறது. முன்னேற்பாடுகள் செய்யப்பட்டு தயார் நிலையில் இருக்கிறோம். பொதுமக்களுக்கு நிலவேம்பு கசாயம் கொடுக்கப்பட்டு வருகிறது.

குழந்தைகளுக்கு நீர்ச்சத்து குறைவு ஏற்படும் என்பதால் ‘கஞ்சியும்’ வழங்கப்படுகிறது. வார்டுகளில் பணியாற்றும் டாக்டர்கள், நர்சுகள், ஊழியர்களுக்கு பாதுகாப்பு முகமுடி வினியோகிக்கப்பட்டுள்ளது.

பன்றி காய்ச்சல் பாதிப்பு உள்ளவர்களுக்கு தனியாக வார்டில் சிகிச்சை அளிக்க ஏற்பாடு செய்யப்பட்டுள்ளது. பன்றி காய்ச்சல் தடுப்பூசி 700 பேருக்கு போடப்பட்டு உள்ளது. தேவையான அளவு தடுப்பூசி மற்றும் மருந்து மாத்திரைகள் இருப்பு வைத்துள்ளோம்.

இவ்வாறு அவர் கூறினார்.

எழும்பூர் குழந்தைகள் நல ஆஸ்பத்திரியில் 47 பேர் காய்ச்சலால் பாதிக்கப்பட்டு சிகிச்சை பெற்று வருவதாகவும், டெங்கு பாதிக்கப்பட்ட 31 குழந்தைகள் தீவிர மருத்துவ கண்காணிப்பில் இருப்பதாகவும் மருத்துவமனை இயக்குனர் அரசர் சீராளர் தெரிவித்தார்.

திருவள்ளூர் அரசு ஆஸ்பத்திரியில் காய்ச்சல் காரணமாக 112 பேர் அனுமதிக்கப்பட்டு சிகிச்சை அளிக்கப்பட்டு வருகிறது. அதில் திருவள்ளூரை அடுத்த புஞ்சி ரெட்டி பள்ளியை சேர்ந்த ரெதீசன் (17), விளாம்பாக்கத்தை சேர்ந்த பொன்னுரங்கம் (30), செம்பேட்டை சேர்ந்த மகேஷ் (27), சீற்றம்பாக்கத்தை சேர்ந்த் காயத்ரி (18), திருவள்ளூர் ராஜாஜி புரத்தை சேர்ந்த் நிஷாந்த் (8) ஆகிய 5 பேரின் ரத்த மாதிரியை சோதனை செய்தபோது டெங்கு காய்ச்சல் இருப்பது தெரிந்தது.

இதையடுத்து 5 பேரையும் தனி வார்டில் வைத்து சிகிச்சை அளிக்கப்படுகிறது. திருவள்ளூர் அரசு ஆஸ்பத்திரியில் காய்ச்சல் சிகிச்சைக்காக பலர் குவிந்த வண்ணம் உள்ளனர். #DengueFever #Swineflu

கோவை:

கோவை அரசு ஆஸ்பத்திரி டீன் டாக்டர் அசோகன் கூறியதாவது:-

எலிக்காய்ச்சல் அறிகுறியுடன் 2 பேர் கோவை அரசு ஆஸ்பத்திரியில் அனுமதிக்கப்பட்டனர். அவர்களுக்கு தேவையான சிகிச்சையை டாக்டர்கள் அளித்தனர். ஆனால் சிகிச்சை பலனளிக்காமல் பொள்ளாச்சி பகுதியை சேர்ந்த ஒருவர் உயிரிழந்தார். மற்றொரு வாலிபர் சிகிச்சை பெற்று வருகிறார்.

கேரள மாநிலத்தில் எலி காய்ச்சல் பரவி வருவதால், கேரளாவை ஒட்டி உள்ள கோவையில் முன் எச்சரிக்கை நடவடிக்கைகள் எடுக்கப்பட்டு வருகிறது. கோவை அரசு ஆஸ்பத்திரியில் காய்ச்சலால் பாதிக்கப்பட்டு அனுமதிக்கப்பட்டு இருப்பவர்கள் தீவிர கண்காணிப்பில் வைக்கப்படுகின்றனர். கேரளாவில் இருந்து காய்ச்சல் பாதிப்புடன் வரும் பொதுமக்கள், அலட்சியமாக இருக்காமல் , சுய மருத்துவம் மேற்கொள்ளாமல் உடனடியாக டாக்டரை அணுகி சிகிச்சை பெற வேண்டும் . எலிக்காய்ச்சல் பாதிப்பு குறித்து , பொது மக்களுக்கு விழிப்புணர்வு ஏற்படுத்தப்பட்டு வருகிறது.

பொதுமக்களுக்கு காய்ச்சல் பாதிப்பு இருந்தால் உடனடியாக அரசு மருத்துவமனையில் சிகிச்சை பெற்றுக் கொள்ளவும்.

இவ்வாறு அவர் கூறினார். #tamilnews